నే నేమి సేయుదును నీవు నాలోపలనుండి – అన్నమయ్య సంకీర్తన

॥పల్లవి॥
నే నేమి సేయుదును నీవు నాలోపలనుండి
శ్రీనాథుడవు నీచేఁత లింతేకాక
॥చ1॥
తనువేమిసేయును తనువులోపలనున్న-
చెనఁటియింద్రియములచేఁతఁలుగాక
మనసేమిసేయును మనసులోపలనున్న-
నినుపుఁ గోర్కులు చేసే నేరములుగాక
॥చ2॥
జీవుఁడేమి సేయును జీవునిఁ బొదుగుకున్న
భావపుప్రకృతి చేసేపాపముగాక
చేవదేరఁ బుట్టు వేమిసేయు ముంచుకొన్నట్టి-
దైవపుమాయలోనిధర్మ మింతేకాక
॥చ3॥
కాలమేమిసేయును గక్కన శ్రీవేంకటేశుఁ –
డేలి మన్నించేమన్నన యిదియేకాక
యేల యేల దూర నింక నెవ్వరు నేమిసేతురు
మేలిమి నినుఁ దలఁచి మెచ్చుటేకాక

రాగము: గుండక్రియ
రేకు: 0093-01
సంపుటము: 1-459