ఎంత చదివిన నేమి వినిన తన-

॥పల్లవి॥
ఎంత చదివిన నేమి వినిన తన-
చింత యేల మాను సిరులేల కలుగు
॥చ1॥
ఇతర దూషణములు యెడసినఁగాక
అతికాముకుఁడుగాని యప్పుడు గాక
మతిచంచలము గొంత మానినఁగాక
గతి యేల కలుగు దుర్గతులేల మాను
॥చ2॥
పరధనములయాస పాసినఁగాక
అరిదినిందలులేనియప్పుడు గాక
విరసవర్తనము విడిచినఁగాక
పరమేల కలుగు నాపదలేల మాను
॥చ3॥
వేంకటపతి నాత్మ వెదకినఁగాక
కింక మనసునఁ దొలఁగినఁగాక
బొంకుమాట లెడసిపోయినఁగాక
శంకయాల మాను జయమేల కలుగు

రాగము: సామంతం
రేకు: 0010-02
సంపుటము: 1-62