నాఁటికి నాఁడే నా చదువు – అన్నమయ్య సంకీర్తన

॥పల్లవి॥
నాఁటికి నాఁడే నా చదువు
మాటలాడుచును మఱచేటి చదువు
॥చ1॥
ఎనయ నీతని నెఱుఁగుటకే పో
వెనకవారు చదివినచదువు
మనసున నీతని మఱచుటకే పో
పనివడి యిప్పటిప్రౌఢలచదువు
॥చ2॥
తెలిసి యితనినే తెలియుటకే పో
తొలుతఁ గృతయుగాదులచదువు
కలిగినయీతనిఁ గాదననే పో
కలియుగంబులోఁ గలిగినచదువు
॥చ3॥
పరమని వేంకటపతిఁ గనుటకే పో
దొరలగు బ్రహ్మాదులచదువు
సిరుల నితని మఱచెడికొరకే పో
విరసపుజీవులవిద్యలచదువు

రాగము: సామంతం
రేకు: 0015-03
సంపుటము: 1-91