తనకర్మవశం – అన్నమయ్య సంకీర్తన

కన్నడ గౌళ
॥పల్లవి॥
తనకర్మవశం బించుక,దైవకృతం బొకయించుక
మనసు వికారం బించుక,మానదు ప్రాణులకు
॥చ1॥
ఈదైన్యము లీహైన్యము లీచిత్తవికారంబులు
యీదురవస్థలు గతులును యీలంపటములును
యీదాహము లీదేహము లీయను బంధంబులు మరి
యీదేహముగలకాలము యెడయవు ప్రాణులకు
॥చ2॥
యీచూపులు యీతీపులు నీనగవులు నీతగవులు-
నీచొక్కులు నీపొక్కులు నీ వెడయలుకలును
యీచెలుములు నీబలువులు నీచనవులు నీఘనతలు-
నీచిత్తముగలకాలము యెడయవు ప్రాణులకు
॥చ3॥
యీవెరవులు నీయెరుకవులు యీతలఁపులు నీతెలువులు
దైవశిఖామణి తిరుమల దేవునిమన్ననలు
దైవికమున కిటువగనక తనతలఁ పగ్గలమైనను
దైవము తానౌ తానే దైవంబవుఁగాన

రాగము: తెలియదు
రేకు: 0010-05
సంపుటము: 1-65