తెలియరాదు మాయదేహమా మమ్ము – అన్నమయ్య సంకీర్తన

॥పల్లవి॥
తెలియరాదు మాయదేహమా మమ్ము
పలువికారాలఁబెట్టి పనిగొన్న దేహమా
॥చ1॥
దినమొక్క వయసెక్కే దేహమా సారె
పెనుమదము గురిసే బెండు దేహమా
దినదిన రుచిగోరే దేహమా నన్ను
ఘనమోహపాశాలఁ గట్టెఁగదె దేహమా
॥చ2॥
తెలివినిద్రలుగల దేహమా నీ-
పొలము పంచభూతాలపొత్తు దేహమా
తిలకించి పాపపుణ్యాల దేహమా
బలువుగలదాఁకా బదుకవో దేహమా
॥చ3॥
తీరని సంసారపు దేహమా ఇట్టె
వూరట లేనిభోగాల వోదేహమా
కూరిమి శ్రీవేంకటేశుఁ గొలిచితి నిఁక నాకు
కారణజన్మమవై కలిగినదేహమా

రాగము: భైరవి
రేకు: 0085-06
సంపుటము: 1-416