మిక్కిలిపుణ్యులు హరి మీదాసులే హరి – అన్నమయ్య సంకీర్తన

॥పల్లవి॥
మిక్కిలిపుణ్యులు హరి మీదాసులే హరి
తక్కినవారు మీకృప దప్పినవారు హరి
॥చ1॥
వున్నతపు సంపదల నోలలాడేయట్టివాఁడు
మున్నిటిజన్మాన నీకు మొక్కినవాఁడు హరి
పన్ని పడనిపాట్లఁ బరులఁ గొలిచేవాఁడు
వున్నతి మిము సేవించనొల్లనివాఁడు హరి
॥చ2॥
పూని దేవేంద్రాదులై పొడవుకెక్కినవారు
శ్రీనాథ మిమ్మునే పూజించినవారు హరి
నానానరకముల నలఁగుచుండేవారు
నానాఁడే నీమహిమ నమ్మనివారు హరి
॥చ3॥
పావనులై నిజభక్తిఁ బ్రపన్నులయ్యినవారు
శ్రీవేంకటేశ మిమ్ముఁ జేరినవారె హరి
వేవేలు దేవతలవెంట దగిలేటివాఁడు
కావించి మిమ్మెఱఁగనికర్మి యాతఁడే హరి

రాగము: దేవగాంధారి
రేకు: 0085-01
సంపుటము: 1-411