అతనికెట్ల సతమైతినో కడు- – అన్నమయ్య సంకీర్తన

॥పల్లవి॥
అతనికెట్ల సతమైతినో కడు-
హితవో పొందులహితవో యెఱఁగ
॥చ1॥
హృదయము తలఁపున నిరవయినఁగదా
పదిలమౌను లోపలిమాట
వెదకినచిత్తము వెర వెఱఁగదు నే –
నెదిరి నెఱఁగ నే నేమియు నెఱఁగ
॥చ2॥
కాలూఁద మనసు గలిగికదా నా-
తాలిమి మతిలోఁ దగులౌట
మేలిమిపతిలో మెలఁగుటేదో నే –
నేలో నే నిపుడెక్కడో యెఱఁగ
॥చ3॥
నేఁడని రేపని నే నెఱిఁగికదా
పోఁడిమి మతిలో పొలుపౌట
వాఁడే వేంకటేశ్వరుఁడు రాఁగలిగె
ఆఁడుజన్మమేనౌటిది యెఱుఁగ

రాగము: సామంతం
రేకు: 0070-06
సంపుటము: 1-369