ఎచ్చోటి కేఁగిన యెప్పుడూఁ దమలోని – – అన్నమయ్య సంకీర్తన

॥పల్లవి॥
ఎచ్చోటి కేఁగిన యెప్పుడూఁ దమలోని –
మచ్చిక పెనుఁదెవులు మానకపోయె
॥చ1॥
పాయపు సతులగుబ్బల పెదపొట్లాల
కాయము వడి నొత్తి కాఁచఁగను
రాయిడిచే ఘనమాయఁగాని లోని-
మాయపు పెనుఁదెవులు మానకపోయె
॥చ2॥
అతివల మోహపుటధరామృతములు
యితవుగ నోరి కందియ్యఁగను
అదిమోహమే ఘనమాయఁగాని లోని-
మతకరిపెనుఁదెవులు మానకపొయె
॥చ3॥
తరుణుల మేనిమెత్తనిపరపులమీఁద-
నిరవుగ నిటు సుఖియించఁగను
తిరువేంకటాచలాధీశుకృపచేఁగాని
మరుచేతి పెనుఁదెవులు మానకపోయె

రాగము: వరాళి
రేకు: 0045-01
సంపుటము: 1-273