ఆపన్నులపాలి దైవమాతఁడే గతిఁదక్క – అన్నమయ్య సంకీర్తన

॥పల్లవి॥
ఆపన్నులపాలి దైవమాతఁడే గతిఁదక్క
యే పొద్దును భజియించఁగ నితరుఁడు మరి కలఁడా
॥చ1॥
నిరుపాధిక నిజబంధుఁడు నిరతి శయానందుఁడు
కరి వరదుఁ డితఁడే గాక ఘనుఁడధికుఁడు గలఁడా
॥చ2॥
సంతత గుణ సంపన్నుఁడు సాధులకుఁ బ్రసన్నుఁడు
అంతర్యామితఁడే కాక అధికుఁడు మరి కలఁడా
॥చ3॥
పరమాత్ముఁడు పరమపురుషుఁడు పరికింపఁగఁ గృపాలుఁడు
తిరువేంకట విభుఁడే కాక దేవుఁడు మరి కలఁడా

రాగము: శ్రీరాగం
రేకు: 0043-06
సంపుటము: 1-266