ఏమి నేయువార మిఁకను – అన్నమయ్య సంకీర్తన

॥పల్లవి॥
ఏమి నేయువార మిఁకను
ఆమని చేలపచ్చలాయ బ్రదుకు
॥చ1॥
దీపనమనియెడి తీరని యాస
రేపుమాపుఁ బెడరేఁచఁగా
తోపునేయఁగరాక దురితపుతరవుల –
కాపదలకు లోనాయ బ్రదుకు
॥చ2॥
వేడుకనెడి పెద్దవిడువనితరవు
వోడ కెపుడు వొద్దనుండఁగా
జోడు విడువరాక చులుకఁదనంబున-
కాడికెలకు లోనాయ బ్రదుకు
॥చ3॥
మమకారమనియెడిమాయతరవు
తిమిర మెక్కించుక తియ్యఁగా
విమలమూరితియైన వేంకటగిరిపతి
అమరఁ జేరక యరవాయ బ్రదుకు

రాగము: వరాళి
రేకు: 0041-02
సంపుటము: 1-250