ఏమి సేయఁగవచ్చు నీశ్వరాధీనంబు – అన్నమయ్య సంకీర్తన

॥పల్లవి॥
ఏమి సేయఁగవచ్చు నీశ్వరాధీనంబు
తామసపుబుద్ధి కంతలు దూరవలసె
read
॥చ1॥
తెగి దురాపేక్షఁబడ తివియ గతిలేదుగన
పగగొన్న వగలకూపములఁ బడవలసె
తగుమోహసలిలంబు దాఁట మతి లేదుగన
మగుడఁబడి భవముతో మల్లాడవలసె
॥చ2॥
పాపకర్మములఁ జంపఁగ శక్తిలేదుగన
కోపబుద్ధులచేత కొరమాలవలసె
రూపములఁ బొడగాంచి రోయఁదరిలేదుగన
తాపములచేఁ బొరలి తగులుగావలసె
॥చ3॥
తిరువేంకటాచలాధిపుఁగొలువలేదుగన
గరిమెచెడి విషయకింకరుఁడు గావలసె
పరతత్వమూర్తిఁ దలఁపఁగఁ బ్రొద్దులేదుగన
దొరతనం బుడిగి యాతురుఁడు గావలసె

రాగము: ఆహిరి
రేకు: 0036-02
సంపుటము: 1-221