తన కర్మమెంత చేఁతయు నంతే – అన్నమయ్య సంకీర్తన

॥పల్లవి॥
తన కర్మమెంత చేఁతయు నంతే
గొనకొన్న పనియంత కూలీనంతే
॥చ1॥
తలఁపులో హరి నెంత దలఁచె నేఁడే వాని
కలిమియు సుఖమును గల దంతే
తులఁదూఁచఁ బైఁడెంత తూఁకము నంతే
నెలకొన్నపిండెంత నిప్పటీ నంతే
॥చ2॥
సిరివరుపూజెంత సేసె నేఁడే వాని-
దరియును దాపు నెంతయు నంతే
పురిగొన్న యీవెంత పొగడూ నంతే
నరపతిచనవెంత నగవూ నంతే
॥చ3॥
శ్రీవేంకటపతి చింత యంత నేఁడే
భావపరవశము పలుకూ నంతే
దైవము కృప యంత తానూ నంతే
యేవంక జయమెంత యిరవూ నంతే

రాగము: సాళంగం
రేకు: 0034-06
సంపుటము: 1-213