ముచ్చుఁగన్న తల్లి చేరి మూలకు నొదిగినట్టు – అన్నమయ్య సంకీర్తన

॥పల్లవి॥
ముచ్చుఁగన్న తల్లి చేరి మూలకు నొదిగినట్టు
తెచ్చిన సంబళ మెల్లఁ దీరుఁబో లోలోనె
॥చ1॥
దప్పముచెడినవాని తరుణి కాఁగిటఁ జేరి
అప్పటప్పటికి నుస్సు రనినయట్టు
వొప్పయిన హరిభక్తి వొల్లనివాని యింటి-
కుప్పలైన సంపదలు కుళ్లుఁబో లోలోనె
॥చ2॥
ఆఁకలి చెడినవాని‌ అన్నము కంచములోన
వోఁకిలింపుచు నేల నొలికినట్టు
తేఁకువైన హరిభక్తి తెరువుగానని వాని-
వేఁకపు సిరులు కొంపవెళ్లుఁబో లోలోనె
॥చ3॥
వొడలుమాసినవాని వొనరుఁజుట్టములెల్ల
బడిబడినే వుండి పాసినయట్టు
యెడయక తిరువేంకటేశుఁ దలఁచనివాని-
ఆడరుబుద్ధులు పగలౌఁబో లోలోననె

రాగము: శ్రీరాగం
రేకు: 0039-04
సంపుటము: 1-240