నరులారా నేడువో నారసింహ జయంతి — అన్నమాచార్య సంకీర్తన

నరులారా నేడువో నారసింహ జయంతి |

సురలకు ఆనందమై శుభము లొసగెను ||

సందించి వైశాఖ శుద్ధ చతుర్దశీ శనివారం

మందు సంధ్యాకాలమున ఔభళేశుడు |

పొందుగా కంభములో పొడమి కడప మీద
కందువ గోళ్ళ చించె కనక కశిపుని ||

నరమృగరూపము నానాహస్తముల
అరిది శంఖచక్రాది ఆయుధాలతో

గరిమ ప్రహ్లాదుని కాచి రక్షించి నిలిచె
గురుతర బ్రహ్మాండ గుహలోనను ||

కాంచనపు గద్దెమీద గక్కున కొలువైయుండి
మించుగ ఇందిర తొడమీద బెట్టుక |

అంచె శ్రీవేంకటగిరి ఆదిమ పురుషుండై
వంచనసేయక మంచి వరాలిచ్చీ నిదివో ||