వెనుకబడిన జిల్లాల మీద ధ్యాస ఏదీ?

మొన్న పద్దెనిమిదో తేదీ ఈనాడులో వచ్చిన వార్తాకథనంలో రాష్ట్రంలో పారిశ్రామిక కేంద్రాలుగా అభివృద్ధి చెయ్యడానికి ఎంపిక చేసిన 11 ప్రాంతాల జాబితా ఇచ్చారు:

పైడి భీమవరం – శ్రీకాకుళం జిల్లా

అచ్యుతాపురం – విశాఖపట్నం జిల్లా

నక్కపల్లి – విశాఖపట్నం జిల్లా

భీమునిపట్నం – విశాఖపట్నం జిల్లా

కాకినాడ – తూర్పుగోదావరి జిల్లా

కంకిపాడు – కృష్ణా జిల్లా

గన్నవరం – కృష్ణా జిల్లా

జగ్గయ్యపేట – కృష్ణా జిల్లా

కొప్పర్తి – కడప జిల్లా

ఏర్పేడు-శ్రీకాళహస్తి – చిత్తూరు జిల్లా

శ్రీసిటీ – చిత్తూరు జిల్లా

అందుబాటులోని నౌకాశ్రయాలు, విమానాశ్రయాలు, మౌలిక సదుపాయాలను పరిగణనలోకి తీసుకుంటూ ఎంపికచేసిన ప్రాంతాలివి. చిత్రమేమిటంటే ఈ ప్రాంతాలకు కనీసం 50 కి.మీ. దూరంలోనే నౌకాశ్రయాలు ఉండేలా జాగ్రత్తలు తీసుకున్నారట! కడప నగరానికి పడమటి దిక్కునున్న కొప్పర్తి నుంచి కృష్ణపట్నం పోర్టు కనీస దూరం గూగుల్ మ్యాప్స్ ప్రకారం 212 కిలో మీటర్లు! 50 కి.మీ. లెక్క ఇక్కడ సరిపోవడం లేదే? తీరా ఆచరణకొచ్చేసరికి కొప్పర్తి ఈ జాబితాలో ఉంటుందా ఊడుతుందా? అనేదొక సందేహమైతే రాయలసీమలోని అనంతపురం, కడప, కర్నూలు జిల్లాలను ఉద్దేశపూర్వకంగా పక్కనపెట్టడానికే కోస్టల్ కారిడార్ అనే అందమైన పేరు పెట్టారా అనేది ఇంకో సందేహం. కొప్పర్తి పేరు ఈ జాబితాలో లేనట్లైతే ఇది కేవలం కోస్తా జిల్లాలకు సంబంధించిన ప్రణాళిక అని, రాయలసీమ జిల్లాల అభివృద్ధికి ఇంకో ప్రణాళిక ఉంటుందేమోనని ఆశించడానికి వీలుండేది. ఇప్పటికైతే అన్నీ సందేహాలే కలుగుతున్నాయి. రాయలసీమలోని వెనుకబడిన జిల్లాల అభివృద్ధికి కేంద్ర ప్రభుత్వం విదిలింపులే గతా లేక రాష్ట్ర ప్రభుత్వం కూడా ఏమైనా దయచూపుతుందా అనే విషయం తేలడం లేదు.

కొన్ని నెలల కిందట చంద్రబాబునాయుడు గారు ఆంధ్రప్రదేశ్‌లోకి, అందునా ప్రత్యేకించి చిత్తూరు, అనంతపురం జిల్లాల్లోకి పెట్టుబడులను ఆహ్వానించడానికి బెంగళూరు వచ్చారు. ఆయన చాలా కష్టపడుతున్నారు. అందులో సందేహం లేదు. పెట్టుబడులను ఆకర్షించడానికి దేశదేశాలు తిరుగుతున్న ఆయన, స్వదేశీ ఇన్వెస్టర్ల కోసం దేశమంతా తిరగడం కూడా తప్పు కాదు. సందేహమల్లా ఆయన ఎంచుకున్న వ్యూహం పట్లనే. బెంగళూర్లో ఆయన చెప్పిన మాటల సారాంశం ఏమిటయ్యా అంటే ‘బెంగళూరు అంతర్జాతీయ విమానాశ్రయం కర్ణాటకలో ఉంది. ఐనా మీరు (పెట్టుబడిదారులు) రాకపోకలు, వస్తురవాణా కోసం ఆ విమానాశ్రయాన్ని వాడుకుని కర్ణాటకలో కాకుండా అక్కడికి అతి దగ్గర్లో ఆంధ్రప్రదేశ్ సరిహద్దుల్లో హిందూపురం, అనంతపురం, కుప్పం లాంటిచోట్ల పెట్టుబడులు పెట్టండి’ అని! ఒకవైపు బెంగళూరు విమానాశ్రయ సేవలను వాడుకుంటూ ఇంకోవైపు కర్ణాటకకు రావలసిన పెట్టుబడులను తన్నుకుపోవాలని చేసిన ఆ ప్రయత్నం బెడిసికొట్టింది. కర్ణాటక, పొరుగునే ఉన్న తమిళనాడు కూడా అప్రమత్తమై, ఆంధ్రప్రదేశ్‌కు ప్రత్యేక హోదా దక్కడానికి వీల్లేదని గళమెత్తాయి. ఆంధ్రప్రదేశ్‌లో ప్రత్యేక హోదాతో పెట్టుబడిదారులకు పన్నురాయితీలు, ఇతర అదనపు ప్రోత్సహకాలు దక్కితే అది తమ రాష్ట్ర ప్రయోజనాలకు విఘాతం కలిగేలా ఉందనే తప్పుడు సంకేతాలు అందడం వల్లే ఇలా జరిగింది. అంతకు ముందు హీరో హోండాను చిత్తూరు జిల్లాకు ఆకర్షించిన చంద్రబాబునాయుడి చాణక్యాన్ని ఆ రాష్ట్రాలు మరిచిపోలేదు. పైగా దక్షిణభారతంలో బి.జె.పి. కాస్త బలంగా ఉండేది కర్ణాటకలోనే. ఆంధ్రప్రదేశ్ కోసం ఆ రాష్ట్ర ప్రయోజనాలకు విఘాతం కలిగేలా మోదీ ప్రభుత్వం వ్యవహరించబోదన్నదీ స్పష్టమే!

మరి దీనికి పరిష్కారమేమిటి?

భారీ ఎత్తున పెట్టుబడులను ఆకర్షించడానికి అంతర్జాతీయ విమానాశ్రయాలు అత్యంత కీలకంగా పరిణమించినందువల్ల రాష్ట్రంలోని అంతర్జాతీయ విమానాశ్రయాల ప్రతిపాదనలను ఒకసారి పరిశీలిద్దాం. పై బొమ్మ శివరామకృష్ణన్ కమిటీ నివేదికలోనిది. దాంట్లో ఒక్కో విమానాశ్రయం పరిధి 150 కిమీ దూరం వరకు ఉంటుందని పేర్కొన్నారు. ఐతే ఆ బొమ్మను చూడగానే కొట్టొచ్చినట్టు కనబడే లోపమేమిటంటే ఇటుపక్కన బెంగళూరు, పై పక్కన హైదరాబాదు విమానాశ్రయాల పరిధిని అంత ప్రముఖంగా చూపించిన ఆ బొమ్మలో చెన్నయ్ విమానాశ్రయ పరిధిని చూపించనేలేదు! చూపినట్లైతే తిరుపతి వల్ల పెరిగే “అదనపు పరిధి” అతిస్వల్పమని తేటతెల్లమయ్యేది. ఆ బొమ్మలో చూపినదాన్ని బట్టే రాయలసీమలో ఒక మూలనున్న తిరుపతిని కేంద్రంగా ఎంచుకున్నట్లైతే బెంగళూరు విమానాశ్రయాన్ని లెక్కలోకి తీసుకున్న తర్వాత కూడా కర్నూలు జిల్లా పూర్తిగానూ, అనంతపురం జిల్లాలో అధికభాగం, కడప, నెల్లూరు, ప్రకాశం జిల్లాల్లోని కొన్ని భాగాలు పారిశ్రామికాభివృద్ధిలో పాలుపంచుకునే అవకాశాన్ని శాశ్వతంగా కోల్పోతాయి. అలా కాకుండా ఉండాలంటే రాష్ట్ర దక్షిణ భాగంలోని అన్ని జిల్లాలకు “సమదూరంలో” అంతర్జాతీయ విమానాశ్రయాన్ని నిర్మించడానికిగానూ పైన పేర్కొన్న ఐదు జిల్లాలకు చిత్తూరు జిల్లాను కూడా కలిపి మొత్తం ఆరు జిల్లాలకు నడిబొడ్డున ఉన్న నగరాన్ని నిర్ణయించే విషయంలో పురపాలక శాఖామంత్రి నారాయణ గారి సలహా తీసుకుని ఉంటే బాగుండేది. ప్రతిపాదిత ప్రాంతాలకు “సమదూరంలో” ఉండే నగరాలను ఎంపిక చెయ్యడంలో ఆయనకు మంచి అనుభవముంది కదా?

రాష్ట్రప్రభుత్వం వెనుకబడిన జిల్లాల అభివృద్ధిని వేగవంతం చేసేలా ఇప్పటికైనా దిద్దుబాటుచర్యలు తీసుకోకపోతే ప్రాంతీయ అసమానతలు అంతకంతకూ పెరిగిపోవడం ఖాయం. పై కథనంలో పేర్కొన్న “వలయాల” విషయమే తీసుకున్నా మొక్కుబడిగానో, కంటితుడుపుగానో 11 ప్రాంతాలను పేర్కొన్నప్పటికీ, ఇప్పుడున్న పరిస్థితుల్లో చివరికి అభివృద్ధి చెందబోయేది విశాఖపట్నం, తూ.గో., కృష్ణా, నెల్లూరు జిల్లాలు మాత్రమేనని అదే కథనంలో స్పష్టంగానే ఉంది.

కొసమెరుపు:

ఆహారశుద్ధి, ఆటోమొబైల్, టెక్స్ టైల్, ఔషధ, వైద్యపరికరాలు, ఎలెక్ట్రానిక్స్, ఏరోస్పేస్ పరిశ్రమలకు కొప్పర్తి అనుకూలమని ఆ కథనంలో ఊదరగొట్టాక రెండురోజులు తిరక్కుండానే 21న వచ్చిన ఇంకో కథనంలో కడప జిల్లాలో సిమెంటు పరిశ్రమలు తప్ప ఇంకే రకమైన పరిశ్రమలూ స్థాపించబోయేది లేదని కుండబద్దలు కొట్టిన ప్రభుత్వం:

– త్రివిక్రమ్

(trivikram@kadapa.info)