ఏమిసేతు దేవదేవ – అన్నమయ్య సంకీర్తన

॥పల్లవి॥
ఏమిసేతు దేవదేవ యింతయును నీమాయ
కామినులఁ జూచిచూచి కామించె భవము
॥చ1॥
చంచలపుఁగనుదోయి సతులబారికిఁ జిక్కి
చంచల మందెను నాదిచ్చరి మనసు
కంచుఁ గుత్తికలవారి గానములఁ జొక్కి చొక్కి
కంచుఁబెంచు నాయఁబో నాకడలేని గుణము
॥చ2॥
తీపులమాటల మించి తెఱవలభ్రమఁ దరి
తీపుల పాలాయఁబో నాతెలివెల్లాను
పూఁపల నవ్వుల తోడి పొలఁతులఁ జూచిచూచి
పూఁపలుఁ బిందెలునై పొల్లువోయఁ దపము
॥చ3॥
కూటమి సతులపొందు కోరి కోరి కూడికూడి
కూటువ నావిర తెందో కొల్లఁబోయను
నీటున శ్రీవేంకటేశ నినుఁగని యింతలోనె
జూటరినై యింతలోనె సుజ్ఞానినైతి

రాగము: కాంబోది
రేకు: 0083-03
సంపుటము: 1-401