హరినెఱఁగనిపుణ్య మంటేరుగాన – అన్నమయ్య సంకీర్తన

॥పల్లవి॥
హరినెఱఁగనిపుణ్య మంటేరుగాన
దురితాలే దురితాలే దురితాలే సుండీ
read
॥చ1॥
దొడ్డపుణ్యములు సేసి తుదలేనిసంపదలు
అడ్డగించుకొని రాసులగుగురుతు
జడ్డులేనిహారికధ చవిలేకుండిన నిట్టే
గొడ్డేరే గొడ్డేరే గొడ్డేరే సుండీ
॥చ2॥
వలేనని మేలేల్ల వడిఁజేసి కైవల్య-
మలమి చేతికిలోననగు గురుతు
తలఁపు వైష్ణవభక్తిఁ దగులకుండిన నంతా
అలయికే అలయికే అలయికే సుండీ
॥చ3॥
తిరమైన తీర్ధాలు దిరిగి యందరిలోన
ధరఁ బుణ్యఁడవుట యంతకు గురుతు
తిరువేంకటపతిఁ దెలియకుండిన నంతా
విరసాలే విరసాలే విరసాలే సుండీ

రాగము: ఆహిరి
రేకు: 0035-06
సంపుటము: 1-219