
రామ రామచంద్ర రాఘవా – అన్నమయ్య సంకీర్తన
॥పల్లవి॥ రామ రామచంద్ర రాఘవా రాజీవలోచన రాఘవా సౌమిత్రి భరత శత్రుఘల తోడ జయమందు దశరథ రాఘవా ॥చ1॥ శిరసు కూఁకటుల రాఘవా చిన్నారి పొన్నారి రాఘవా గరిమ నావయసునఁ దాటకిఁ జంపిన కౌసల్యనందన రాఘవా అరిది యజ్ఞముగాచు రాఘవా అట్టె హరువిల్లు విఱిచిన రాఘవా సిరులతో జనకుని యింటను జానకిఁ జెలఁగి పెండ్లాడిన రాఘవా ॥చ2॥ మలయు నయోధ్యా రాఘవా మాయామృగాంతక రాఘవా చెలఁగి చుప్పనాతి గర్వ మడఁచి దైత్యసేనలఁ జంపిన రాఘవా సొలసి వాలిఁజంపి రాఘవా దండి సుగ్రీవునేలిన రాఘవా జలధి బంధించిన రాఘవా లంక సంహరించిన రాఘవా ॥చ3॥ దేవతలు చూడ రాఘవా నీవు దేవేంద్రు రథమెక్కి రాఘవా రావణాదులనుఁ జంపి విభీషణు రాజ్యమేలించిన రాఘవా వేవేగ మరలి రాఘవా వచ్చి విజయ పట్టమేలి రాఘవా శ్రీవేంకటగిరిమీఁద నభయము చేరి మాకిచ్చిన రాఘవ |
రాగము: వసంతం రేకు: 0081-05 సంపుటము: 1-392 |
Tags: Annamacharya Keerthanalu, Telugu Devotional, అన్నమయ్య సంకీర్తనలు, తాళ్ళపాక అన్నమయ్య కీర్తనలు, అన్నమయ్య, తాళ్ళపాక అన్నమయ్య, అన్నమయ్య పాటలు, Carnatic Songs, వసంతం