మరిగి వీరిపో మాదైవంబులు – అన్నమయ్య సంకీర్తన

॥పల్లవి॥
మరిగి వీరిపో మాదైవంబులు
కెరలిన హరి సంకీర్తనపరులు
॥చ1॥
వినియెడి వీనుల విష్ణుకథలకే
పనిగొందురు మాప్రపన్నులు
కనియెడి కన్నులు కమలాక్షునియం
దనువుపరతు రటు హరిసేవకులు
॥చ2॥
పలికెడిపలుకులు పరమాత్మునికై
యలవరతురు శరణాగతులు
తలఁచేటి తలఁపులు ధరణీధరుపై
తలకొలుపుదు రాతదియ్యులు
॥చ3॥
కరముల శ్రీపతికైంకర్యములే
మురియుచుఁ జేతురు ముముక్షులు
యిరవుగ శ్రీవేంకటేశ్వరు మతమే
సిరుల నమ్ముదురు శ్రీవైష్ణువులు

రాగము: గుండక్రియ
రేకు: 0083-04
సంపుటము: 1-402