ఊరికిఁ బోయెడి వోతఁడ కడు- – అన్నమయ్య సంకీర్తన

॥పల్లవి॥
ఊరికిఁ బోయెడి వోతఁడ కడు-
చేరువతెరు వేఁగి చెలఁగుమీ
॥చ1॥
ఎడమతెరువువంక కేఁగిన దొంగలు
తొడిఁబడ గోకలు దోఁచేరు
కుడితెరువున కేఁగి కొట్టువడక మంచి-
నడిమితెరువుననే నడవుమీ
॥చ2॥
అడ్డపుఁ దెరువుల నటునిటుఁ జుట్టాలు
వెడ్డువెట్టుచు నిన్ను వేఁచేరు
గొడ్డేరేచిన్నదిడ్డితెరువు వోక
దొడ్డతెరువువంక తొలఁగుమీ
॥చ3॥
కొండతెరువు కేఁగి కొంచపుసుఖముల
బండై తిరుగుచు బడలేవు
అండనుండెడిపరమాత్ముని తిరుమల-
కొండతెరువు తేఁకువ నేఁగుమీ

రాగము: ఆహిరి
రేకు: 0015-01
సంపుటము: 1-89