ఇలయును నభమును నేకరూపమై

॥పల్లవి॥
ఇలయును నభమును నేకరూపమై
జలజల గోళ్ళు జళిపైంచితివి
॥చ1॥
ఎడసిన నలముక హిరణ్యకశిపునిఁ
దొడికపట్టి చేతుల బిగిసి
కెడపి తొడలపై గిరిగొన నదుముక
కడుపు చించి కహకహ నవ్వితివి
॥చ2॥
రొప్పుల నూర్పుల రొచ్చుల కసరులు
గుప్పుచు లాలలు గురియుచును
కప్పినబెబ్బులిక సరుహుంకృతుల
దెప్పరపసురల ధృతి యణఁచితివి
॥చ3॥
పెళ పెళనార్చుచుఁ బెడబొబ్బలిడుచు
థళథళ మెఱువఁగ దంతములు
ఫళఫళ వీరవిభవరసరుధిరము
గుళగుళ దిక్కుల గురియించితివి
॥చ4॥
చాతినుప్రేవులజన్నిదములతో
వాతెరసింహపువదనముతో
చేతులు వేయిటఁ జెలగి దితిసుతుని
పోతర మణఁపుచు భువి మెరసితివి
॥చ5॥
ఆహోబలమున నతిరౌద్రముతో
మహామహిమల మలయుచును
తహతహ మెదుపు చుఁ దగువేంకటపతి
యిహముఁ బరముఁ మా కిపు డొసఁగితివి

రాగము: నాట
రేకు: 0014-03
సంపుటము: 1-85