ఇన్ని జన్మము లేఁటికి హరిదాసు- – అన్నమయ్య సంకీర్తన

॥పల్లవి॥
ఇన్ని జన్మము లేఁటికి హరిదాసు-
లున్న వూరఁ దా నుండినఁ జాలు
॥చ1॥
హరిభక్తుల యింటియన్నము గొనువారి-
వరువుడై వుండవలెనన్నఁ జాలు
పరిమభాగవత భవనంబులఁ జెడ్డ
పురువు దానయి పొడమినఁ జాలు
॥చ2॥
వాసుదేవుని భక్తవరులదాసులు మున్ను-
రోసినయెంగిలి రుచిగొన్నఁ జాలు
శ్రీ సతీశునిఁ దలఁచినవారి దాసాన-
దాఁసుడై వుండఁదలఁచినఁ జాలు
॥చ3॥
శ్రీ వేంకటేశుఁ జూచినవారిశ్రీ పాద-
సేవకుఁడై యండఁజేరినఁ జాలు
యీవిభుదాసుల హితుల పాదధూళి-
పావనమై సోఁకి బ్రదికినఁ జాలు

రాగము: శ్రీరాగం
రేకు: 0070-04
సంపుటము: 1-367