ఇతరులకు నిను నెరుగతరమా సతత సత్యవ్రతులు – అన్నమయ్య సంకీర్తన

॥పల్లవి॥
ఇతరులకు నిను నెరుగతరమా సతత సత్యవ్రతులు
సంపూర్ణమోహవిరహితు లెఱుగుఁదురు నినునిందిరారమణా
॥చ1॥
నారీకటాక్షపటు నారాచభయరహిత-
శూరులెఱుఁగుదురు నినుఁ చూచేటి చూపు
ఘోరసంసార సంకులపరిచ్ఛేదులగు-
ధీరులెఱుఁగుదురు నీదివ్యవిగ్రహము
॥చ2॥
రాగభోగవిదూర రంజితాత్ములు మహా-
భాగు లెరుఁగుదురు నినుఁ బ్రణుతించువిధము
ఆగమోక్త ప్రకారాభిగమ్యులు మహా-
యోగులెఱుఁగుదురు నీవుండేటివునికి
॥చ3॥
పరమభాగవత పదపద్మసేవానిజా-
భరణులెఱుఁగుదురు నీ పలికేటిపలుకు
పరగు నిత్యానంద పరిపూర్ణ మానస-
స్థిరు లెఱుఁగుదురు నినుఁ దిరువేంకటేశ

రాగము: శ్రీరాగం
రేకు: 0041-04
సంపుటము: 1-252