ఇందిర వడ్డించ నింపుగను

॥పల్లవి॥
ఇందిర వడ్డించ నింపుగను
చిందక యిట్లే భుజించవో స్వామి-
॥చ1॥
అక్కాళపాశాలు నప్పాలు వడలు
పెక్కైనసయిఁదంపుపేణులును
సక్కెరరాసులు సధ్యోఘృతములు
కిక్కిరియ నారగించవో స్యామీ
॥చ2॥
మీరినకెళంగు మిరియపుఁదాళింపుఁ –
గూరలు కమ్మనికూరలును
సారంపుఁబచ్చళ్ళు చవులుగ నిట్టే
కూరిమితోఁ జేకొనవో స్వామీ
॥చ3॥
పిండివంటలునుఁ బెరుగులుఁ బాలు
మెండైన పాశాలు మెచ్చి మెచ్చి
కొండలుపొడవు కోరి దివ్యాన్నాలు
వెండియు మెచ్చేవే వేంకటస్వామీ

రాగము: శ్రీరాగం
రేకు: 0004-02
సంపుటము: 1-22