ఆతనినే నే కొలిచి నే నందితిఁ బో నిజసుఖము – అన్నమయ్య సంకీర్తన

॥పల్లవి॥
ఆతనినే నే కొలిచి నే నందితిఁ బో నిజసుఖము
శ్రీతరుణీపతి మాయాధవుఁడు సృష్టియింతయును హరిమూలము
॥చ1॥
కోరుదుమా దుఁఖములు కోర కేతెంచు తముఁదామే
ఆరీతులనే సుఖములు యేతెంచు నందును విచారమంతేల
సారేకు దైవాధీనములివి రెండు స్వయత్నములుగా వెవ్వరికి
కోరేటి దొకటే హరిశరణాగతి గోవిందుఁడే యింతకు మూలము
॥చ2॥
కమ్మంటిమా ప్రపంచము గలిగీ స్వభావము అందుకది
యిమ్ముల మోక్షము యీరీతులనే యీశ్వరుఁడిచ్చిన యిది గలుగు
కమ్మి అంతర్యామికల్పితంబు లివి కాదననవుననరాదెవ్వరికి
సమ్మతించి ఆసపడియెడి దొకటే సర్వలోకపతి నిజదాస్యము
॥చ3॥
సరి నెఱఁగుదుమా పోయినజన్మము సారేకు నేమేమిచేసితిమా
యిరవుగ నట్లా మీదఁటిజన్మముయెఱుకలు మఱపులు యిఁకనేలా
నిరతమై శ్రీవేంకటేశుఁడు తనయిచ్చ నిర్మించిన దిదియీదేహము
గరిమెల నాతనికైంకర్యమెపో కలకాలము మాకు కాణాచి

రాగము: గుజ్జరి
రేకు: 0090-04
సంపుటము: 1-444