హరిఁ గొలిచియు మరీ నపరములా – అన్నమయ్య సంకీర్తన

॥పల్లవి॥
హరిఁ గొలిచియు మరీ నపరములా
తిరముగ నతనినే తెలియుటగాకా
॥చ1॥
పంకజనాభునిపాదములు దలఁచి
యింకా మరి యొకయితరములా
అంకెల నతనినే అతనిదాసులనే
కొంకక నిజముగఁ గొలుచుటగాకే
॥చ2॥
పన్నగశయనునిబంట్లకు బంటై
కొన్నిటిపై మరి కోరికెలా
యిన్ని కోరికలు యిదియే తనకని
కొన్నది కోలై కోరుటగాకా
॥చ3॥
వీనుల వేంకటవిభునామామృత –
మూనిన మతి మరియును రుచులా
తేనెలుగారెడితీపు లతనిమతి
నానారుచులై ననుచుటగాకా

రాగము: భైరవి
రేకు: 0047-05
సంపుటము: 1-290