వెన్నవట్టుక నేయి వెదకనేలా మరియు – అన్నమయ్య సంకీర్తన

॥పల్లవి॥
వెన్నవట్టుక నేయి వెదకనేలా మరియు
నెన్ని వలసిన దమయేలిటివే కావా
॥చ1॥
తలఁపునకు విష్ణుచింతన నిమిషమాత్రంబు
కలుగుటే కలుగువలెఁగాక
వలనైన భోగములు వైభవంబులు మరియు
కలవెల్ల తమయెదుటఁ గలిగినవె కావా
॥చ2॥
పదిలముగ హరినామపఠన మంత్రము నోరు
కదియుటే కలుగవలెఁగాక
తుదలేని సంపదలు తొలగని ముదంబులును
కదలకెప్పుడుఁ దమకు గలిగినవె కావా
॥చ3॥
యించుకైనను వేంకటేశు గిరిశిఖరంబు
కాంచుటే కలుగవలెఁగాక
అంచితంబైన నిత్యానంద పదవులను
మించి తమయెదుటఁ బ్రభనించినవె కావా

రాగము: శ్రీరాగం
రేకు: 0033-01
సంపుటము: 1-202