వలపులధికము సేయు వైభవములు

॥పల్లవి॥
వలపులధికము సేయు వైభవములు
తలఁపు లధికము సేయుఁ దలపోఁతలు
॥చ1॥
కోపమధికము సేయుఁ గోరికలు
తాప మధికము సేయు దమకంబులు
కోపంబుఁ దాపంబుఁ గూడ నధికము సేయు
యేపయిన మోహముల నేమందమే
॥చ2॥
మచ్చికధికము సేయు మన్ననలు
యిచ్చ లధికము సేయు నీరసములు
మచ్చికలు నిచ్చలును మగుడ నధికము సేయు-
నెచ్చరిక కూటముల నేమందమే
॥చ3॥
అందమధికము సేయుఁ నైక్యములు
పొందులధికము సేయుఁ బొలయలుకలు
అందములుఁ బొందులును నలరనధికముసేయు-
నెందు నరుఁదగు వేంకటేశు కృపలు

రాగము: శ్రీరాగం
రేకు: 0024-04
సంపుటము: 1-146