మహి నింతటివారువో మనవారు – అన్నమయ్య సంకీర్తన

॥పల్లవి॥
మహి నింతటివారువో మనవారు
బహుమహిమలవారు ప్రపన్నులు
॥చ1॥
జయమంది జననపుజరామరణముల-
భయములేనివారు ప్రపన్నులు
క్రియలెల్ల నుడిగి మూఁగినకర్మపుటడవి
బయలుచేసినవారు ప్రపన్నులు
॥చ2॥
ధీరులై మాయంధకారంబు నెదిరించి
పారఁదోలినవారు ప్రపన్నులు
సారమయ్యినసంసారసాగరము
పారముగన్నవారు ప్రపన్నులు
॥చ3॥
అండ నిన్నిటాయఁ దనిసి యాసలెల్లాఁ దెగఁగోసి
పండినమనసువారు ప్రపన్నులు
దండిగా శ్రీవేంకటేశుదాసులై పరముతోవ
బండిబాట చేసినారు ప్రపన్నులు

రాగము: రామక్రియ
రేకు: 0093-04
సంపుటము: 1-462