బోధకు లెవ్వరు లేక భోగినైతిని – అన్నమయ్య సంకీర్తన

॥పల్లవి॥
బోధకు లెవ్వరు లేక భోగినైతిని
శ్రీధరుఁడే మాకు దిక్కు చింతింప నిఁకను
॥చ1॥
పట్టి దిగంబరినై పాలే యాహరముచేసి
తొట్టినపంచేంద్రియములతోవ విడిచి
పుట్టితి సన్యాసినై బుద్దెఱిఁగీనెఱగక
అట్టె నడుమ సంసారినైతి నేనూ
॥చ2॥
గచ్చుల నన్నీ మఱచి గాలే ఆవటించుకొని
అచ్చపుఁబరమయేకాంతసమాధి
నిచ్చలు నిద్రాభ్యాసనిర్మలయోగినైతి
కచ్చుపెట్టి మేలుకొని ఘనకర్మినైతి
॥చ3॥
భావము పారవిడిచి బ్రహ్మండమెల్ల నిండి
వేవేలు గోరికల వేడుకతోడ
జీవన్ముక్తుఁడనైతి శ్రీవేంకటేశ్వరుఁ జేరి
ధావతు లిన్నియు మాని తన్మయుఁడనైతి

రాగము: కన్నడగౌళ
రేకు: 0094-01
సంపుటము: 1-465