పొరాక పోయి తలఁపుననున్న దైవంబుఁ – అన్నమయ్య సంకీర్తన

॥పల్లవి॥
పొరాక పోయి తలఁపుననున్న దైవంబుఁ
జేరనొల్లక పరులఁజేరఁదిరగెదము
॥చ1॥
వడిఁబారు పెనుమృగము వలలలోపలఁ దగులు
వడి వెడల గతిలేక వడఁకుచున్నట్లు
చెడనికర్మములలోఁ జిక్కి భవములబాధఁ
బడియెదముగాక యేపనికిఁ దిరిగెదము
॥చ2॥
నీరులోపలిమీను నిగిడి యామిషముకై
కోరి గాలము మ్రింగి కూలబఁడినట్లు
జారిపోయిననేల సంసారసౌఖ్యవి-
కారంపుమోహములఁ గట్టువడియెదము
॥చ3॥
శ్రీవేంకటేశు నాశ్రితలోకరక్షకుని
భావింప దేవతాపతియైనవాని
సేవించుభావంబు చిత్తమొడఁబడక నే-
మీవలావలిపనుల నిట్లఁ దిరిగెదము

రాగము: గుండక్రియ
రేకు: 0064-04
సంపుటము: 1-331