పరుసమొక్కటేకాదా పయిఁడిగాఁ జేసేది – అన్నమయ్య సంకీర్తన

॥పల్లవి॥
పరుసమొక్కటేకాదా పయిఁడిగాఁ జేసేది
అరయ లోహమెట్టున్నా నందుకేమి
॥చ1॥
వనజనాభువిభక్తి వదలకుండినఁ జాలు
మనసు యెందు దిరిగినా మరియేమి
మొనసి ముద్రలు భుజముల నుండితేఁ జాలు
తనవెంతహేయమైనా దానికేమి
॥చ2॥
శ్రీకాంతునామము జిహ్వఁ దగిలితే జాలు
యేకులజుఁడైనాను హీనమేమి
సాకారుఁడైనహరి శరణుచొచ్చినఁ జాలు
చేకొని పాపము లెన్ని చేసిననేమి
॥చ3॥
జీవుఁడెట్టున్నానేమి జీవునిలో యంతరాత్మ
శ్రీవేంకటేశున కాచింతయేమి
యేవలవఁ బరమైన యిహమైన మాకుఁ జాలు
కైవశమాయ నతఁడు కడమలింకేమి

రాగము: సామంతం
రేకు: 0078-04
సంపుటము: 1-373