పరమపాతకుఁడ భవబంధుఁడ శ్రీ –

॥పల్లవి॥
పరమపాతకుఁడ భవబంధుఁడ శ్రీ –
హరి నినుఁ దలఁచ నే నరుహుఁడనా
॥చ1॥
అపవిత్రుఁడ నే నమంగళుఁడఁ గడు-
నపగతణ్యుఁడ నలసుఁడను
కపటకలుషపరికరహృదయుఁడ నే-
నపవర్గమునకు నరుహుఁడనా
॥చ2॥
అతిదుష్టుఁడ నే నధికదూషితుఁడ
హతవివేకమతి నదయుఁడను
పతిలేని రమాపతి మిముఁదలఁచలే
నతులగతికి నే నరుహుఁడనా
॥చ3॥
అనుపమవిషయపరాధీనుఁడ నే-
ననంతమోహభయాతురుఁడ
వినుతింపఁగ దిరువేంకటేశ ఘను-
లనఘులుగాక నే నరుహుఁడనా

రాగము: సామంతం
రేకు: 0005-04
సంపుటము: 1-33