పరగు బహుసజ్జన్మపరిపక్వ హృదయుఁడై

॥పల్లవి॥
పరగు బహుసజ్జన్మపరిపక్వ హృదయుఁడై
మరికదా వేదాంతమార్గంబు గనుట
॥చ1॥
కలుషహరమగువివేకమ్ము గలిగినయట్టి-
ఫలముగాదా కృపాపారీణుఁడౌట
తలపోసి సకలభూతదయా విశేషంబు
కలిగికాది గుణవికారంబు గనుట
॥చ2॥
యెదిరిఁ దనవలెనె తా నెఱఁగనేర్చినఫలము
అదిగదా ద్రవ్యమోహంబు గడచనుట
పదిలమగు నాశానుభవము పాపినయట్టి-
తుదగదా తాను సంతోషంబు గనుట
॥చ3॥
రతిపరాజ్ముఖమహరాజ్యమబ్బినఫలము –
మతిగదా తాను కర్మత్యాగియౌట
తతితోడ ఫలపరిత్యాగి చిత్తవ్యాపి-
ధృతిగదా వేంకటాధిపు దాసుఁడౌట

రాగము: నారణి
రేకు: 0022-01
సంపుటము: 1-131