నీవేకానింక నే నన్య మెఱఁగ యే-

॥పల్లవి॥
నీవేకానింక నే నన్య మెఱఁగ యే-
త్రోవ చూపి నాకుఁ దోడయ్యెదవయ్య

॥చ1॥
అపరాధనత కోట్లయినవి వొక్క-
నెపమున ననుఁ గావనేరవా
అపరిమితదురితా లైనవి యే-
ఉపమచేత నన్ను నుద్దరించెదవయ్య
॥చ2॥
అతిశయముగఁ గర్మినైతిని నీ-
మతము నాకొకయింత మరపవా
ఇతర కర్మారంభహితుఁడను
గతి మోక్ష మెటువలెఁ గల్పించెదవయ్య
॥చ3॥
తిరువేంకటాచలాధీశ్వరా నీ-
శరణాగతులఁ బ్రోవఁజాలవా
పరమదయానందపరుఁడవు యే-
వెరవున భవములు వెడలఁ ద్రోచెదవయ్య

రాగము: శ్రీరాగం
రేకు: 0003-04
సంపుటము: 1-17