నిత్యులు ముక్తులు నిర్మలచిత్తులు నిగమాంతవిదులు వైష్ణవులు – అన్నమయ్య సంకీర్తన

॥పల్లవి॥
నిత్యులు ముక్తులు నిర్మలచిత్తులు నిగమాంతవిదులు వైష్ణవులు
సత్యము వీరల శరణని బ్రదుకరో సాటికిఁ బెనఁగక జడులాల
॥చ1॥
సకలోపాయశూన్యులు సమ్యగ్జ్జ్ఞానపూర్ణులు
అకలంకులు శంఖచక్రలాంఛను లన్నిట బూజ్యులు వైష్ణవులు
వొకటీ గోరరు వొరుల గొలువరు వొల్లరు బ్రహ్మదిపట్టములు
అకటా వీరలసరియనఁ బాపం బారుమతంబులపూఁతకోకల
॥చ2॥
మంత్రాంతరసాధనాంతరంబులు మానినపుణ్యులు విరక్తులు
యంత్రపుమాయలఁ బొరలుపరులకు యెంతైనా మొక్కరు వైష్ణవులు
తంత్రపుకామక్రోధవిదూరులు తమనిజధర్మము వదలరు
జంత్రపుసంసారులతో వీరల సరియని యెంచఁగఁ బాపమయ్య
॥చ3॥
తప్పరు తమపట్టినవ్రత మెప్పుడు దైవ మొక్కడేఁ గతియనుచు
వొప్పగుతమపాతివ్రత్యంబున నుందురు సుఖమున వైష్ణవులు
కప్పిన శ్రీవేంకటపతిదాసులు కర్మవిదూరులు సాత్వికులు
చెప్పకుఁడితరుల సరిగా వీరికి సేవించఁగ నే ధన్యుఁడనైతి

రాగము: మాళవి
రేకు: 0085-04
సంపుటము: 1-414