దైవము పుట్టించినట్టి తన సహజమే కాక – అన్నమయ్య సంకీర్తన

॥పల్లవి॥
దైవము పుట్టించినట్టి తన సహజమే కాక
కోవిదునికైనా జాలిగుణ మేల విడుచు
॥చ1॥
ఆరయఁ బంచదార నద్దుక తినఁబోతే
చేరరాని ముష్టిగింజ చేఁదేల మాను
సారమైన చదువులు సారె సారెఁ జదివినా
గోరపు దుష్టునికి కోపమేల మాను
॥చ2॥
నిప్పు దెచ్చి వొడిలోన నియమానఁ బెట్టుకొంటే
యెప్పుడును రాఁజుఁగాక యిది యేల మాను
ముప్పిరిఁ బాతకుఁడైన మూఢుఁడెన్ని యాచారాలు
తప్ప కెంతసేసినాను దయ యేల కలుగు
॥చ3॥
యింటిలోనఁ గొక్కు దెచ్చి యిరవుగఁ బెట్టుకొంటే
దంటయై గోడలు వడఁదవ్వ కేలమాను
గొంటరై శ్రీవేంకటేశుఁ గొలువకుండినవాఁడు
తొంటి సంసారవుఁగాక దొర యేఁటి కౌను

రాగము: ముఖారి
రేకు: 0095-06
సంపుటము: 1-476