దురితదేహులే తొల్లియును శ్రీ- – అన్నమయ్య సంకీర్తన

॥పల్లవి॥
దురితదేహులే తొల్లియును శ్రీ-
హరి భజించి నిత్యాధికులైరి
॥చ1॥
అనంతకోటి మహామునులు ఈ-
సనకాదులు నిశ్చలయశులు
ఇనశశినయనుని నితనిని మును
గని భజించి గత కల్మషులైరి
॥చ2॥
అతిశయమతులు మహామహులు సుఖ-
రతి విముఖులును చిరంతనులు
హిత విచారమతి నితనిని సం-
తతమును భజించి ధన్యులైరి
॥చ3॥
దేవతాధిపులు దివ్యులును కడుఁ-
బావనులును తగ బరహితులు
యీ వేంకటపతి నితనిని
సేవించి సుఖాంచితమతులైరి

రాగము: శుద్ధవసంతం
రేకు: 0004-01
సంపుటము: 1-21