దిక్కిందరికినైన దేవుఁడు కడుఁ

॥పల్లవి॥
దిక్కిందరికినైన దేవుఁడు కడుఁ
దెక్కలికాఁడైన దేవుఁడు
॥చ1॥
కొత్తపైండ్లికూఁతుఁ గోరి చూడఁబోయు
యెత్తి తేరిమీఁద నిడుకొని
నెత్తికన్ను మానినవాని పెండ్లికి
దెత్తిగొన్న యట్టి దేవుఁడు
॥చ2॥
గొప్పయునపెద్దకొండమీఁద నుండి
దెప్పరమ్ముగా దిగఁబడి
కప్పి రెండుదునుకలు గూడినవాని
తిప్పుఁదీరులాడే దేవుఁడు
॥చ3॥
బెరసి మేనమామబిడ్డకునై పోయు
నిరతఁపుబీరాలు నెరపుచు
యిరవైనమాయపుటెద్దులఁ బొరిగోన్న-
తిరువేంకటగిరి దేవుఁడు

రాగము: ఆహిరి
రేకు: 0018-05
సంపుటము: 1-111