తలఁపు కామాతురత్వముమీఁదనలవడిన-

॥పల్లవి॥
తలఁపు కామాతురత్వముమీఁదనలవడిన-
నిల నెట్టివారైన నేలాగు గారు
॥చ1॥
ఓలినిరువురుసతుల నాలింగనముసేయ
లోలుఁడటుగాన నాలుగుచేతులాయ
వేలసంఖ్యలు సతుల వేడుకల రమియింపఁ
బాలుపడెఁగాన రూపములు పెక్కాయ
॥చ2॥
పొలయలుకకూటముల భోగి దా నటుగాన
మలసి యొక్కొకవేళ మారుమొగమాయ
లలితలావణ్యలీలావిగ్రహముగాని
కొలఁది వెట్టఁగరానిగోళ్ళు నిడుపాయ
॥చ3॥
చిరభోగసౌఖ్యములఁ జెంద ననుభవిగాన
తిరువేంకటాచలాధీశ్వరుండాయ
పరగ సంసారసంపదకు బద్ధుఁడు గాన
అరుదుగా సకలాంతరాత్మకుండాయ

రాగము: వరాళి
రేకు: 0017-05
సంపుటము: 1-105