చాలదా హరినామ సౌఖ్యామృతము – అన్నమయ్య సంకీర్తన

॥పల్లవి॥
చాలదా హరినామ సౌఖ్యామృతము దమకు
చాలదా హితవైన చవులెల్ల నొసఁగ
॥చ1॥
ఇదియొకటి హరినామ మింతైనఁ జాలదా
చెదరకీ జన్మముల చెఱలు విడిపించ
మది నొకటె హరినామ మంత్రమది చాలఁదా
పదివేలు నరకకూపముల వెడిలించ
॥చ2॥
కలదొకటి హరినామ కనకాద్రి చాలదా
తొలఁగుమని దారిద్ర్యదోషంబు చెఱుచ
తెలివొకటి హరినామ దీపమది చాలదా
కలుషంపు కఠినచీఁకటి పారఁద్రోల
॥చ3॥
తగువేంకటేశు కీర్తన మొకటి చాలదా
జగములో కల్పభూజంబు వలెనుండ
సొగిసి యీ విభునిదాసుల కరుణ చాలదా
నగవుఁజూపులను నున్నతమెపుడుఁ జూప

రాగము: శ్రీరాగం
రేకు: 0008-04
సంపుటము: 1-52