చాలదా మా జన్మము నీ-

॥పల్లవి॥
చాలదా మా జన్మము నీ-
పాలింటివారమై బ్రతుకఁగఁ గలిగె
open
॥చ1॥
కమలాసనాదులు గానని నీపై
మమకారము సేయ మార్గము గలిగె
అమరేంద్రాదుల కందరాని నీ-
కొమరైన నామము కొనియాడఁ గలిగె
॥చ2॥
సనకాదులును గానఁజాలని నిన్నుఁ
తనివోవ మతిలోనఁ దలపోయఁ గలిగె
ఘనమునీంద్రులకు నగమ్యమైవున్న-
నిను సంతతమును వర్ణింపఁగలిగె
॥చ3॥
పరమమై భవ్యమై పరిగిననీ-
యిరవిట్టిదని మాకు నెఱుఁగంగఁ గలిగె
తిరువేంకటాచలాధిప నిన్ను యీ-
ధరమీఁదఁ బలుమారు దరిసింపఁ గలిగె

రాగము: సామంతం
రేకు: 0018-04
సంపుటము: 1-110