కూడులేక యాఁటికిఁ గూరఁ దిన్నట్లు – అన్నమయ్య సంకీర్తన

॥పల్లవి॥
కూడులేక యాఁటికిఁ గూరఁ దిన్నట్లు
ఆడనీడ మోవిచిగురాకు దినేరయ్య
॥చ1॥
దుండగపుఁ బగవారు దోఁచఁగానే తమకాన
కొండలెక్కినట్లు సిగ్గు గొల్లఁబోఁగాను
దండువెళ్లేమదనునిదాడికి సతులచన్ను-
గొండలెక్కి సారెసారె గోడనేరయ్య
॥చ2॥
పొదిగొన్న యలపుతోఁ బొదలుతీగెలక్రింద
తుదలేనిభయముతోఁ దూరినట్లు
మృదువైనతరుణుల మెఱఁగుబాహులతల.-
పొదలెల్లఁ దూరితూరి పుంగుడయ్యేరయ్య
॥చ3॥
వలసగంపలమోపువలె లంపటము మోఁచి
తలఁకుచుఁ బారలేక దాఁగినయట్లు
యిల వేంకటేశ నిన్నెఱఁగ కింద్రియముల
తలవరులిండ్లనే దాఁగేరయ్య

రాగము: ఆహిరి
రేకు: 0038-04
సంపుటము: 1-234