ఎవ్వరివాఁడో యెఱఁగరాదు – అన్నమయ్య సంకీర్తన

॥పల్లవి॥
ఎవ్వరివాఁడో యెఱఁగరాదు
అవ్వలివ్వలిజీవుఁ డాటలో పతిమే
॥చ1॥
ధర జనించకతొలుత తనుఁ గానరాదు
మరణమందినవెనక మఱి కానరాదు
వురువడిదేహముతో నుండినయన్నాళ్లే
మరలుజీవునిబదు‌కు మాయవో చూడ
॥చ2॥
యిహములో భోగించు నిందుఁ గొన్నాళ్లు
మహిమ పరలోకమున మలయుఁ గొన్నాళ్లు
తహతహలఁ గర్మబంధములఁ దగిలినయపుడే
అహహ దేహికిఁ బడుచులాటవో బదుకు
॥చ3॥
సంతానరూపమై సాగు ముందరికి
కొంత వెనకటిఫలము గుడువఁ దాఁ దిరుగు
యింతటికి శ్రీవేంకటేశుఁడ డంతర్యామి
బంతి నితనిఁ గన్నదుకువో బదుకు

రాగము: గుండక్రియ
రేకు: 0095-02
సంపుటము: 1-472