ఇన్ని లాగులచేతు లివియపో కడు-

॥పల్లవి॥
ఇన్ని లాగులచేతు లివియపో కడు-
నెన్నిక కెక్కినచేతు లివియపో
॥చ1॥
గునియుచుఁ దనునెత్తుకొమ్మని తల్లిపై-
నెనయఁ జాఁచినచేతు లివియపో
కినిసి గొవర్ధనగిరి వెల్లగించిన-
యునుమువంటి చేతు లివియపో
॥చ2॥
పిసికి పూతకిచన్ను బిగియించిపట్టిన-
యిసుమంతలు చేతు లివియపో
పసులఁ గాచుచు గొల్లపడుచుల యమునలో
యిసుక చల్లినచేతు లివియపో
॥చ3॥
పరమచైతన్యమై ప్రాణుల కెల్లను
యెరవులిచ్చినచేతు లివియపో
తిరువేంకటగిరి దేవుఁడై ముక్తికి-
నిరవు చూపెడుచేతు లివియపో

రాగము: ఆహిరి
రేకు: 0027-05
సంపుటము: 1-166