ఇదివో సంసారమెంత సుఖమో కాని – అన్నమయ్య సంకీర్తన

॥పల్లవి॥
ఇదివో సంసారమెంత సుఖమో కాని
తుదలేని దుఃఖమను తొడవు గడియించె
॥చ1॥
పంచేద్రియంబులను పాతకులు దనుఁదెచ్చి
కొంచెపు సుఖంబునకుఁ గూర్పఁగాను
మించి కామంబనేడిమేఁటి తనయుండు జని-
యించి దురితధనమెల్ల గడియించె
॥చ2॥
పాయమనియెడి మహపాతకుఁడు తనుఁ దెచ్చి
మాయంపు సుఖమునకు మరుపఁగాను
సోయగపు మోహమను సుతుఁడేచి గుణమెల్లఁ
బోయి యీనరకమనుపురము గడియించె
॥చ3॥
అతియుండగువేంకటాద్రీశుఁడను మహ-
హితుఁడు చిత్తములోన నెనయఁగాను
మతిలోపల విరక్తిమగువ జనియించి య-
ప్రతియయి మోక్షసంపదలు గడియించె

రాగము: శ్రీరాగం
రేకు: 0050-05
సంపుటము: 1-308