అతిదుష్టుఁడ నే నలసుఁడను – అన్నమయ్య సంకీర్తన

॥పల్లవి॥
అతిదుష్టుఁడ నే నలసుఁడను
యితర వివేకం బిఁకనేది
॥చ1॥
ఎక్కడ నెన్నిట యేని సేసితినొ
నిక్కపుఁదప్పులు నేరములు
గక్కన నిన్నిట కలిగిననీవే
దిక్కుగాక మరి దిక్కేది
॥చ2॥
ఘోరపుఁబాపము కోట్లసంఖ్యలు
చేరువ నివె నాచేసినవి
నీరసునకు నిటు నీకృప నాకిఁక
కూరిమి నా యెడ గుణమేది
॥చ3॥
యేఱిఁగి చేసినది యెఱఁగక చేసిన
కొఱతలు నాయెడఁ గోటు లివే
వెఱపు దీర్చి శ్రీవేంకటేశ కావు
మఱవక నాగతి మరి యేది

రాగము: ఆహిరి
రేకు: 0013-02
సంపుటము: 1-78