అంతర్యామీ అలసితి సొలసితి – అన్నమయ్య సంకీర్తన

॥పల్లవి॥
అంతర్యామీ అలసితి సొలసితి
యింతట నీ శరణిదె చొచ్చితిని
॥చ1॥
కోరిన కోర్కులు కోయని కట్లు
తీరవు నీవవి తెంచక
భారపుఁ బగ్గాలు పాపపుణ్యములు
నేరుపులఁ బోనీవు నీవు వద్దనక
॥చ2॥
జనుల సంగములఁ జక్కరోగములు
నిను విడువవు నీవు విడిపించక
వినయపు దైన్యము విడువని కర్మము
చనదిది నీవిటు సంతపరచక
॥చ3॥
మదిలో చింతలు మయిలలు మణుఁగులు
వదలవు నీవవి వద్దనక
యెదుటనేఁ శ్రీవేంకటేశ్వర నీవదె
అదనఁ గాచితివి అట్టిట్టనక

రాగము: లలిత
రేకు: 0079-06
సంపుటము: 1-381