వేదం బెవ్వని వెదకెడిని – అన్నమయ్య సంకీర్తన

॥పల్లవి॥
వేదం బెవ్వని వెదకెడిని
ఆ దేవునిఁ గొనియాడుఁడీ
॥చ1॥
అలరిన చైతన్యాత్మకుఁడెవ్వఁడు
కలఁ డెవ్వఁ డెచటఁ గలఁడనిన
తలఁతు రెవ్వనినిఁ దనువియోగదశ
యిల నాతని భజియించుఁడీ
॥చ2॥
కడఁగి సకలరక్షకుఁడిం దెవ్వఁడు
వడి నింతయు నెవ్వనిమయము
పిడికిట తృప్తులు పితరులెవ్వనినిఁ
దడవిన, ఘనుఁడాతనిఁ గనుఁడీ
॥చ3॥
కదిసి సకలలోకంబులవారలు
యిదివో కొలిచెద రెవ్వనిని
త్రిదశవంద్యుఁడగు తిరువేంకటపతి
వెదకి వెదకి సేవించుఁడీ

రాగము: పాడి
రేకు: 0001-05
సంపుటము: 1-5