వననిధిఁ గురిసిన వానలివి మతి- – అన్నమయ్య సంకీర్తన

॥పల్లవి॥
వననిధిఁ గురిసిన వానలివి మతి-
పనిలేని పనుల భారములు
॥చ1॥
అడవుల వెన్నెల లారిడి బదుకులు
తడతాఁకుల పరితాఁపములు
వొడలొసఁగిన హరి నొల్లక యితరుల
బడి బడిఁ దిరిగిన బంధములు
॥చ2॥
కొండల నునుపులు కొనకొన మమతలు
అండలఁ కేగిన నదవదలు
పండిన పంటలు పరమాత్ము విడిచి
బండయి తిరిగిన బడలికలు
॥చ3॥
బచ్చన రూపులు పచ్చల కొలపులు
నిచ్చలనిచ్చల నెయ్యములు
రచ్చల వేంకటరమణునిఁ గొలువక
చచ్చియుఁ జావని జన్మములు

రాగము: ఆహిరి
రేకు: 0004-04
సంపుటము: 1-24